Thursday, March 2, 2023

മഴയുടെ കൈയൊപ്പ്



 ഒരു പൈങ്കിളിയുടെ പാട്ടുപോല്‍

അതിലോലമായ മഴത്തുള്ളികള്‍

ആകാശത്ത് ഒഴുകുന്നു,

മഴ നനഞ്ഞ് ചുവന്ന മണ്ണിന്റെ ഗന്ധം 

എല്ലായിടത്തും പരക്കുന്നു

എനിക്ക് വീണ്ടും സംശയം

ലോകം മഴയ്ക്ക് ശേഷം തിളങ്ങുന്നുണ്ടോ?

ഇളം മഴയെയും മണ്ണിന്റെ ഗന്ധത്തെയും 

ഇടിമിന്നലിന്റെ മിന്നുന്ന ശബ്ദം വിഴുങ്ങുന്നു

രാത്രിയില്‍ കുളങ്ങളില്‍ തവളകള്‍ പാടുന്നു


ഈ മഴയത്ത്

യുദ്ധത്തെക്കുറിച്ച് ആരും അറിയുകയില്ല, 

ഒരാള്‍ പോലും.

പെയ്തുതീരുമ്പോള്‍ ശ്രദ്ധിക്കും

ഇപ്പോള്‍ ആരും കാര്യമാക്കുന്നില്ല, 

പക്ഷിയോ മരമോ


ആരും അറിയുന്നില്ല, വസന്തവും ഹേമന്തവും 

മനുഷ്യ വംശത്തിന്റെ നാശം

പുലര്‍കാലത്തേക്ക് ഉണര്‍ന്നെണീക്കുമ്പോള്‍ 

നമ്മള്‍ പോയി എന്ന് അറിയിക്കാന്‍ പോലും

ഒന്നുമവശേഷിച്ചിട്ടുണ്ടാവില്ല,

എല്ലാം കഴുകിത്തുടച്ച്

മരണത്തിന്റെ കൈയൊപ്പു ചാര്‍ത്താന്‍

അപ്പോഴും മഴ ചാറുന്നുണ്ടാവും


Thursday, February 16, 2023

നിന്നില്‍ പാകിയ വിത്ത്

 


ആഴത്തില്‍

ആഴമെത്രെയെന്നറിയില്ല

ഒരു മനുഷ്യനും 

നിന്നെ തേടിയിറങ്ങിയിട്ടുണ്ടാവില്ല


ഉയരത്തില്‍

ഉയരമെത്രെയെന്നറിയില്ല

ഞാനല്ലാതെ

നീയിരിക്കുന്ന ചില്ലതേടി പറന്നിട്ടുണ്ടാവില്ല


തിരയില്‍

തിരയുടെ കരുത്തറിയില്ല

നീയും നമ്മുടെ പ്രണയവും 

ഇത്രമേലെന്നില്‍ ഇരമ്പിയാര്‍ത്തിട്ടുണ്ടാവില്ല


മഴയില്‍

മഴയുടെ തണുപ്പറിയില്ല

ഒരു തണുപ്പും, നിന്റെ സ്‌നേഹത്തോളം

എന്നെ പൊതിഞ്ഞു നിന്നിട്ടുണ്ടാവില്ല


മഞ്ഞു പെയ്തു

മഴ പെയ്തു

വെയില്‍വന്നുപോയി

റാന്തല്‍ വിളക്കിലെ മണ്ണെണ്ണ വറ്റി

കളിനിര്‍ത്തി കുട്ടികള്‍ പിരിഞ്ഞു

നിറഞ്ഞ കുപ്പികളൊഴിഞ്ഞു

പകല്‍മാറി ഇരുള്‍ നിറഞ്ഞു


എന്നിട്ടും

കിളിയൊഴിഞ്ഞ കൂട്

ചില്ലയോടൊട്ടിനില്‍ക്കുംപോലെ

പറഞ്ഞതും പറയാത്തതുമായ 

എന്റെ ദുഖങ്ങള്‍ 

നനവുവറ്റി വരണ്ടുപോയ 

എന്റെ സ്വപ്‌നങ്ങളില്‍ 

നിന്നെ വരയ്ക്കുന്നു


ഒടുവില്‍

ജീവിതവും മരണവും

ഇരുളും വെളിച്ചവും

എന്തിനെന്റെ സ്വപ്‌നങ്ങളത്രെയും പേറി 

നീയാകുന്ന മണ്ണില്‍ നിന്നു

മുളപൊട്ടാന്‍ കാത്തിരിക്കുന്ന 

വിത്താകുന്നു ഞാന്‍


FACEBOOK COMMENT BOX